تاريخين شعر يازديغيم كاغيذيدا قئيد ائله‌مه‌سم ده، شعر آذربايجانين اؤلمز
شاعيري«ممد آراز»ين حياتدان كؤچدويو گون يازيليب. ائله بونا گؤره ده بو
شعر او‌ْنون شرفلي خاطيره‌سينه اتحاف او‌ْلونور. آللاه او‌ْنا رحمت ائيله‌سين.
او‌ْخودو،
او‌ْخودو،
كيتاب او‌ْخودو.
كيتاب‌دان غريبه بير لذّت آلدي،
او‌ْ لذّت كي،
نه يئمك‌ده،
نه گئيمك‌ده،
نه ده بؤيوكلوك ائله‌مك‌ده، وار ايدي.
نهايت بير او‌ْتاق دوشدو پاي‌ينا.
بير ماسالي،
بير استوللو،
كاغيذ ـ قلملي او‌ْتاق،
او‌ْ بير دؤولت او‌ْلدو آرتيق.
قالالي، ـ
يئنيلمز دؤولت.
ناحاق هر نه ايسه اوْنوتدو،
آتدي،
اوْمودلا،
گئجه ـ گوندوز ياراتدي.
سئودييي اوْنوتدو،
سئودييي آلداتدي،
سئودييي آتدي.
او‌ْ اينجيدي،
اَلي اَسدي.
لپه ـ لپه،
دالغا ـ دالغا،
او‌ْ اؤلمه‌دي، ـ
او‌ْ ياراتدي.
جمع ائيله‌دي، بير دونياني بير ذر‌ّه‌نين ايشيغينا،
اوزَرريك‌تك تلاطوملي بير دونياني.
فغان،
سس ـ كويله اوزبه‌اوز،
كيمي دئدي: ـ وار حد‌ّينه هله بير آز،
كيمي دئدي: ـ باشي كسيلمه‌لي آرتيق، ـ
خو‌ْل ـ بوْداغي يامان آرتيب.
نهايت بير هاراي گلدي؛
«غم ائيله‌مه ممد آراز».
او‌ْ اوْتاندي،
او‌ْ چُكيندي.
او‌ْ حاقلا، ناحاق‌ّ او‌ْينوندا،
او‌ْ قالدي قوْلاق قو‌ْينوندا.
او‌ْ ائشيتدي،
او‌ْ دينمه‌دي،
او‌ْ «لال» او‌ْلدو.
او‌ْ دينه بيلن،
دينمك ايسته‌مه‌ين،
بير لال او‌ْلدو.
او‌ْنون بوتون حياتي بير آمال او‌ْلدو.
«آذربايجان دونيام منيم».
او‌ْ اؤلمه‌دي،
او‌ْ داها دا يوكسكلري جاينلاقلاييب
او‌ْ بو‌ْي آتدي.
او‌ْ دوْرمادي،
او‌ْ ياراتدي.
داغلار او‌ْينار يئري او‌ْلدو.
هر داغ بير يو‌ْلداشي او‌ْلدو.
زيروه، زيروه‌يه قارشي،
داغ داغلا ياناشي دوْردو.
دو‌ْغدو لازيملي كؤرپه‌ني ايكي‌ليك،
گؤستردي اؤزونو مغرور يئكه‌ليك.
او‌ْ ايندي بير آواز ايدي،
او‌ْ ايندي بير سؤز ايدي.
او‌ْ دو‌ْغرودان دا ايندي بير
دوْرماز،
آخار،
آراز ايدي.
او‌ْ دؤزولمز غمه دؤزدو،
او‌ْ اؤلمه‌دي.
هارداسا بير عؤمورلوك دو‌ْست اينجيدي، ـ
زحمتي اؤلچويه سيغمايان بير دو‌ْست، ـ
كووره‌لدي بير آز،
دؤزمه‌دي آراز!
دايانيب،
دوْردو آراز،
اؤلدو آراز.
هارداسا آورو‌ْپادا بير كؤرپه او‌ْلدو، ـ
گله‌جه‌يين فيلو‌ْسوفو،
كيتابيني قاباقجادان پو‌ْچتا سيفاريش وئرين!
گؤنده ر
بؤلوم لر: